[LET'S PARTY] 私房菜

今次好似變左私房菜咁...

話說姑仔個好友返左黎香港，我姑仔就問佢個朋友可否上黎食餐飯～
咁姑仔要求到，就盡量排個期比佢啦！
但係對方我唔識的，我唔明點解要叫佢上黎食飯～哈哈！仲要好似專登帶佢上黎，一定要黎試咁！　
算啦！當比個機會我試煮唔同的菜式！

今次佢朋友係唔知英國定美國返黎，咁我無理由煮返西餐架～＠＠
所以今次煮左東南亞菜式比佢地！

[第21道] 黃金雞腿肉-淮山版 (附食譜)

本身這是一個法國的菜式，但好明顯我無錢吃法國菜！
所以我都答你唔到這是否同法國菜的味道一樣！
不過係幾好食的，味道比較清淡
今次我會變少少，用鮮淮山代替薯仔！味道都好好架
[淮山，又稱山藥，增強免疫力、抗癌、補虛益氣、保護胃壁、防治糖尿病與動脈硬化]

黃金雞腿肉-淮山版（4人用）
雞小腿　4-5條
洋蔥　　1個
甘荀　　1條
淮山　　1個*
本菇　　1包
煙肉　　約3片
雞湯　　800ml
白酒　　100ml
鹽　　　適量
黑胡椒　適量
月桂葉　3~4片
麵粉　　2湯匙
牛油　　1湯匙
1. 雞小腿洗淨抹乾，輕輕切幾刀，加上鹽同黑椒醃三十分鐘
2. 甘荀滾刀切；洋蔥切大塊；本菇切尾撕小片；煙肉切小塊
3. 雞小腿沾上麵粉大火煎至金黃色後盛起
4. 同一個鑊加牛油後加洋蔥、甘荀、本菇、煙肉炒香後加入麵粉略炒
5. 加入白酒煲至滾，再加入雞湯煲滾後加入雞小腿及月桂葉
6. 加入鹽巴&黑胡椒調整味道，繼續煮至少30~45分鐘
7. 完成前十分鐘，將淮山去皮滾刀切好放入鍋中即可




* 如用薯仔，就一開始放入去～

[每日一煮] 五柳糖醋魚柳, 蝦醬炒生菜

大少同我都一樣咁愛甜甜酸酸的食物~ 所以今次整左這個五柳糖醋魚柳, d五柳菜~真係可以就咁用黎餸飯~ haha~
不過今次個汁煮少左d 下次會煮返多d ga la~ ^^

[第20道] 意式蕃茄冷麵 (附食譜)

這個麵係之前睇電視學的，但味道很好，有蕃茄的酸甜，蒜頭及羅勒的香！SO GOOD~

夏天無胃口可以試一試哦！

意式蕃茄冷麵　(二人份)

意大利粉　200g
蕃茄　　　4-5個
蒜頭　　　4粒
羅勒　　　數片

鹽　　　　適量
黑椒　　　適量
橄欖油　　1湯匙

1. 先將蕃茄底部的皮上「界刂」十字，放入熱水煮一陣，見佢的皮有ｄ分離就隔水裝起[圖2]
2. 蕃茄去皮後切粒，放入篩中隔去蕃茄汁液
3. 蒜頭切蓉後放入大碗中，加入少少鹽*備用[圖3]
4. 煲滾水加鹽，然後加入意大利粉，請看包裝上所需時間！**
5. 將煮好的意大利飯放入蒜頭的大碗中，加入蕃茄、切碎的羅勒，再以鹽、黑椒、橄欖油調味後即可食用

* 幫助蒜頭出味ｄ
** 如果想放入雪櫃之後才吃，意粉煮少約一分鐘

[每日一煮] 豆豉蒸排骨, 薑蔥蒸豆腐, 三味蛋莧菜

食左幾餐豐富又熱氣的野~ 係時候蒸下野清一清 !
今次煮左大少欽點的薑蔥蒸豆腐, 唔好以為唔係咁好食~ 其實豆腐配上薑蔥真係幾好味!
大家可以一試!!!

本身打算整金銀蛋莧菜, 但最近又話d皮蛋有問題~
只好攞左朋友係台灣買比我的手信"三味蛋"黎煮~ 一樣姐~ =p
三味蛋, 佢好似係鹵蛋+皮蛋+咸蛋於一身~ 但係皮蛋的味唔太出就是了~

[第19道] 蘋果提子茶 (附食譜)

上次人地上黎食飯~ 送左d蘋果比我地！
食唔晒～除左煲湯仲可以做咩？
試下煲野飲啦！
細細個入院的時候，隔離ｄ師奶教我的！
味道酸酸甜甜淡淡的！夏天煲一煲放入雪櫃～得閒飲下！爽呀~~~
[蘋果茶] 有潤膚,養顏,袪斑的功效. 對皮膚乾燥,面色無華,面上斑多的人最有幫助.

蘋果提子茶
大蘋果2個(人地餸小蘋果，所以用多些）
金提子乾28g(可用黑提子乾)
1. 蘋果用少許鹽擦洗乾淨切片；金提子乾輕輕洗淨
2. 先將提子乾加水4碗水[圖2]，煲至水滾後煮10分鐘，再加入蘋果[圖3]，滾約3分鐘即成*




* 如果要放入雪櫃，一定要隔清所有渣才放，可以放2-3天

[Let's Party] 美好的一晚

今晚雖然人少少，但傾了很多事，能夠彼此鼓勵，彼此代禱，實屬美事～
期待下一次再聚～　^^

[第18道] 青豆湯 (附食譜)

多年前係大埔的餐廳飲過一次，覺得都唔錯喎！

今次人地黎我屋企要煮西餐，就變化下啦！唔駛黎黎去去都係果幾款！

 

青豆湯(4-6人)
急凍青豆　400克
薯仔　　　1個
洋蔥　　　1個
麵粉　　　30g
雞湯　　　1L
香葉　　　2片
牛油　　　40g
牛奶　　　200ml
鹽　　　　少許

1. 洋蔥及薯仔切粒備用
2. 鍋中下牛油，以中火炒香洋蔥[圖1]，再下青豆炒 10分鐘[圖2]。
3. 加入麪粉拌勻後，再下雞湯薯仔和香葉，煮滾後收中火煲 10分鐘，撈出香葉。
4. 將湯倒入攪拌器中打成茸，用隔篩隔去豆衣。
5. 把湯回鍋，加入牛奶和鹽，以細火煮至滾即可上碗

[每日一煮] 意式蕃茄冷麵配火箭菜

由於我平常的夜晚都不太喜好吃飯，所以通常只煮給老公及第二天帶飯的飯量！
但每到星期五的時候，我就不知如何煮好
因為我第二天不用帶飯，只煮１碗半飯比老公，好難煮！
所以同老公協議了：如果第二天唔駛帶飯的話，就轉煮一些麵類～
而今餐就係老公要求的「夏天吃一些冷麵吧！」

不過吃完今餐~ 知道老公不愛火箭菜及羅勒~嘿~

[第17道] 大豆芽蝦醬湯 (附食譜)

邊個話韓國菜一定係辣架！
身邊好多人一諗起韓國菜就一定係食辣野～
其實都唔係架！
都有好多係唔辣的～
好似今次呢個湯！
又唔辣～又簡單！大家試下啦～　^^

韓式大豆芽蝦醬湯 (2-3人份)
大豆芽菜　200g
魚乾　　　20g
昆布　　　20cm
大蔥　　　1棵
辣椒　　　半條
蒜茸　　　1大匙
韓國蝦醬　1大匙*
胡椒粉　　少許
水　　　　4杯
1. 大豆芽菜洗淨，大蔥和辣椒斜切成片
2. 魚乾去除內臟**，昆布輕輕洗一洗
3. 鍋裡放入水和魚乾，煮滾後放入昆布，用小火煮5分鐘後把魚乾和昆布撈起
4. 放入大豆芽菜，蓋上鍋蓋煮5分鐘
5. 放入蒜茸，韓國蝦醬，辣椒，大蔥和胡椒粉略煮即可

* [圖1]右下果支係蝦醬
** [圖2] 圖中的黑色部份為內臟，必需清理乾淨

[Let's Party] 父親節

結左婚後，真係會越發現爸爸的愛！
每次約佢食飯，買野食氹佢，同佢傾計～佢都係笑不攏嘴
佢的開心就連身邊的人都會知道！
而我最盼望的，還是希望佢能信主！

係父親節，當然要煮ｄ佢愛的野食啦！
仲要預備埋啤酒，同佢啤啤～希望爸爸感受到我地佢的愛啦！

[第16道] 韓式泡菜蒟蒻冷麵 (附食譜)

天氣咁熱，得閒做下ｄ冷麵食下消下暑！！！

蒟蒻的吸水力很強，容易產生飽足感，kcal又低～

加埋泡菜酸酸辣辣的，同蘋果的清甜～大家一定要試試～　^^  

韓式泡菜蒟蒻冷麵 (1人份)
芋絲　　1包
素鴨　　1/4件
青瓜　　適量
蘋果　　半個
車厘茄　5-6粒
泡菜　　適量
涼拌醬韓式辣醬 1湯匙
醋 2湯匙
糖1湯匙
蘋果 1/4個
蒜蓉1/2茶匙

1. 先將涼拌醬中的1/4個蘋果磨蓉，與其他拌醬材料拌勻備用
2. 芋絲拆開，素鴨切件，青瓜泡絲，蘋果切條（浸鹽水），車厘茄開半，泡菜切件
3. 煲一煲滾水，加入素鴨灼一下盛起備用
4. 煲內加入芋絲，煲至水滾後盛起放入冰水降溫，然後隔水備用
5. 裝盤後即可食用（芋絲＞車厘茄＞青瓜＞素鴨＞蘋果＞泡菜＞涼拌醬）

食粽節

今年端午節好特別，好耐無試過係婆婆屋企包粽
唔係我唔乖，係近年婆年紀大，所以無包，
不過今年因為請左工人，所以就開左個教授班！
將包粽的技巧傳比下一代，而我就成為大家的目標，一定要學
很高興婆婆讚我包得好
包粽最緊要的係包得實，咁就唔會太淋，d米又hea晒出黎
又唔可以太大力，否則就好易爛
希望下年有時間包啦^^

另外一個特別就係試多左粽，今年試食左2款

聖安娜桂花紅豆粽 （$60四件）
我堂姐極力推介，我覺得佢都幾好食，唔算太甜，紅豆蓉幾滑，但略嫌桂花味不足，要好仔細才發現

東海堂冰粽（$2x兩件）
今次試左芒果味同十勝紅豆味
坦白講，芒果味我都幾失望，原本以為佢用新鮮芒果，點知係假到爆的軟糖味
反而紅豆覺得唔錯，佢入面有紅豆粒，唔錯！

今日收到堂姐比的手信，唔同牌子的明太子醬，
諗下有咩菜式可以整左佢，唔好淨係整意粉咁悶..^^

[第15道] 蜜黑豆 (附食譜)

有一次到一間韓國餐廳吃飯，令我愛上這個前菜！
煙煙 un un 的口感，加上咸咸甜甜的味道，真係會一粒接一粒不停食架！
黎過我屋企食這個前菜的人，大家都有這種感覺呢！

蜜黑豆

黑豆　　2両/75G
水　　　300ml
調味料A：生抽　　1湯匙
老抽　　1湯匙
糖　　　2湯匙
糖漿　　1湯匙 [圖2]
調味料B：芝麻油　1/2湯匙
芝麻　　適量

1. 黑豆洗淨，浸30分鐘；加300ml水[圖1]，煲滾後轉小火後煮30分鐘
2. 加調味料A後小火煮15mins 至收汁[圖3]3. 關火後加入調味料B，雪凍後食

[每日一煮] 魚香茄子, 午餐肉炒蛋, 炒菜心

第一次煮魚香茄子, 今次做得不錯~ 下次再做好d 的時候~ 就同大家分享啦~ ^^
(個樣好靚呀~ *0*)

[第14道] 金銀蒜墨魚粉絲蒸絲瓜 (附食譜)

這是一味很好送飯的菜式，

無論單單金銀蒜粉絲蒸魷魚，或是金銀蒜蒸絲瓜都是很好吃的！

對於我呢ｄ又想食多些菜，又唔想一ｄ肉都無的人來說～

２樣一齊蒸就附合晒所有要求～ =p

金銀蒜墨魚粉絲蒸絲瓜
墨魚　　　1隻
粉絲　　　1小扎
絲瓜　　　1條
蒜頭　　　7-8顆
炸蒜頭　　適量
鹽　　　　適量
酒　　　　1茶匙
胡椒粉　　少許
蒸魚豉油　1湯匙**
1. 粉絲浸軟，切段；墨魚去皮切件[圖2]*；絲瓜去少許皮後，切段開半；蒜頭切成碎
2. 魷魚加少少鹽、胡椒粉及酒後拌勻，絲瓜加少許鹽及酒
3. 放絲瓜、粉絲、墨魚後再放上蒜蓉及炸蒜[圖3]
4. 中大火蒸10分鐘後，不用倒水，灑上蒸魚豉油後即可食用。

* 墨魚需去皮去內臟
** 無蒸魚豉油，可用生抽同老抽代替，但要調節份量，以免過咸

[每日一煮] 蕃茄濃湯, 蒜片牛柳粒, 焗葡汁雜菜

[第13道] 蕃茄粟米湯(飯) (附食譜)

因為一個朋友想煲一些簡單的湯，並且想知道點煲！

所以係度一齊分享下煲咩湯好！
基本上湯有分老火湯同滾湯，不過對於一個要返工的人黎講，老火湯真係唔係成日都煲到！
但滾湯就無問題啦！時間短好多，好快就煲好！又好味，加埋ｄ飯入去就變湯飯
有時唔落飯，就咁飲湯，食ｄ菜咁又一餐！

蕃茄粟米肉片湯 (2-3人用)
蕃茄2-3個
粟米2條
瘦肉150-200g(圖中為五花肉，因為屋企有想用埋佢）
甘荀1小條
薑2片
水1.5L
1. 將蕃茄及甘荀切粒；取粟米粒，粟米芯開2-3*；瘦肉切片
2. 水滾後，加入薑及所有材料，再滾後轉小火煲約半小時後加鹽調味即可
（今次我有加埋翠玉瓜粒，因為屋企有剩半條，所以用埋佢，唔係必要的）





* 將粟米取粒及要埋粟米芯係因為幫助快d出味！

[LET'S PARTY] 約……

由新年前約到依家，終於約成了，不過想佢黎的仍然沒發出席！！！><

首次畫MENU ~ 由我同姑仔合力畫的~ ^^

[第12道] 涼拌芽菜、涼拌菠菜(附食譜)

韓國菜最常吃的到，我相信就係小碟
每次去韓國菜的餐廳，店員都會放上8-10款小碟
每樣的小碟都很好吃，基本上只吃小碟都可以吃晒成碗飯！

因為老公喜歡芽菜的關係，所以基本上每次煮韓國菜時都會煮這個涼拌芽菜！
而且這個又易煮，希望大家喜歡！


涼拌芽菜
芽菜　200g
韮菜　小量
調味料：鹽　　　　3/4茶匙*
麻油　　　1.5湯匙
蒜蓉　　　1.5茶匙
辣椒粉　　適量**
炒香芝麻　1茶匙

1. 將芽菜洗淨備用；韮菜洗淨切段（非必要的，若有可加，增加香味）
2. 煲一鍋水，水滾後加入芽菜及韮菜，蓋上蓋中火煮至芽菜熟透***[圖1]
3. 煮好加入冰水當中降溫後瀝乾
4. 加入調味料拌勻後[圖2]可即食或雪凍後才食！
* 可加入魚露，約加魚露，鹽要用小些
** 想吃辣才要加，無的可用日本的七味粉
*** 中途千祈不要開蓋，才沒有菜青味！


涼拌菠菜
菠菜　1斤
做法跟芽菜一樣，但瀝乾是用手擠出水！




 * 菠菜需要擠得比較乾，像梅菜那樣；也可以調味一次後，試一試味，唔夠再加～～

[每日一煮] 韓式大豆芽蝦醬湯，煎素鴨，青瓜泡菜，韓式魚仔

平時午餐的時候都食得夠多肉，所以晚餐的時候，不妨食多ｄ菜類的野！
好似今餐，我得ｄ魚仔係肉黎的！哈哈哈！